gipuzkoakultura - ondarea

Brokoako eskifaia Untzi Musoean

2008-08-18T07:50:53Z

Uztailaren amaieran aurreratu genizuen Brokoa txalupak, kabotaje-nabigazioaren ondarea berreskuratzeko asmoz, egingo zuen itsas-bidaiaren berri. Bizkaitik Nafarroaraino burdina garraiatzeko mendeetan zehar erabili zen itsasbidea jarraituz, uztailaren 31n, 19:00etan, Brokoa Donostiako portura iritsi zen. Bertan, eskifaia kideek Untzi Museoa bisitatu zuten.

]]> Gonzalo Duok eta Itsas Begia Euskal Itsas Ondarea Babesteko elkarteak antolatu zuten bidai hau, Bizkaiko burdinaren itsasbidea gogoratzeko. Brokoa txalupa Bilbotik atera zen uztailaren 29an eta Urdazubira iritsi aurretik ondoko herrietan egin zituen geldiuneak: Portugalete, Plentzia, Bermeo, Zumaia, Donostia, Donibane Lohizune eta Azkaine.

Donostiara iristean, senideak eta lagunak zituzten zain, Untzi Museoko arduradunekin batera. Museoko arduradunek Donostia, itsas hiria erakusketan bisita gidatua eskaini zieten.

Arkeologia-jardueretarako diru laguntzak

2008-08-14T07:32:48Z

Azaroaren 14a arte zabalik dago Gipuzkoako Lurralde Historikoan arkeologi ondasunei eragiten dieten lanen ondoriozko arkeologia-jarduerak gauzatzeko diru-laguntzen deialdia, Kultura Ondarearen Zuzendaritza Nagusiak urtero deitzen duen diru-laguntza programaren barruan.

]]> Diru-laguntza hauek, legeak horrela behartuta, miaketa, zundaketa edo indusketa arkeologikoak burutu behar izan dituzten partikularrei edo eraikuntzako enpresa sustatzaileei daude zuzenduta, lan hauek sortzen dituzten gastuak ordaintzeko.

Laguntzei buruz gehiago jakiteko ondoko fitxategia kontsulta dezakezue:

-Gipuzkoako Lurralde Historikoan arkeologi ondasunei eragiten dien obren ondoriozko arkeologia-jarduerak gauzatzeko diru-laguntzak (Word, 57,5 KB)

Deialdiaren oinarri arautzaileak ere kontsulta ditzakezue abuztuaren 5eko GAOean.

Bizkaiko burdinaren kabotajea

2008-07-28T12:25:37Z

Uztailaren 29tik abuztuaren 2ra, asteartetik larunbatera, Brokoa txalupak burdina eramango du Bilbotik Azkainera, Bizkaia, Gipuzkoa eta Lapurdiko kostaldean barrena, ondoko herrietan geldituz: Portugalete, Plentzia, Bermeo, Zumaia, Donostia eta Donibane Lohizune. Azkainetik Urdazubiko San Salbatore monasteriora garraiatuko dute gurdietan. Itsas Begia Euskal Itsas Ondarea Babesteko elkarteak antolatu du ekimen hau, kabotaje-nabigazioaren ondarea berreskuratzeko. Oroitzapenezko ekimen honek hainbat erakunderen laguntza eta babesa du; besteak beste, Gipuzkoako Foru Aldundiarena.

]]> XVI eta XIX mendeen artean, Enkarterrietako meategietako burdina itsaso eta lur bidez garraiatzen zen. Uda partean, mea kabotaje bidez -portuz portu kostaldetik urrundu gabe- garraiatzen zuten burdinoletatik gertuen zeuden portuetara.

Burdinaren industriak mozkin handiak ematen zizkien prozesuan parte hartzen zuten eragileei: meatzari, garraiolari, merkatari, pleitari, maisu eta marinelak... Burdinola bakoitzeko 100 pertsona inguruk lortzen zituzten mozkinak.

Hain zuzen, jarduera hau oroitzeko bidaia antolatu du Itsas Begia elkarteak. Bilbotik Urdazubiko San Salbatore monasteriora garraiatuko dute burdina, Portugalete, Plentzia, Bermeo, Zumaia, Donostia,Donibane Lohizune eta Azkainera.

Brokoa txalupan egingo dute itsas-bidaia. Txalupa hau XIX. mendeko bizkaitar erako txalupa baten eredua jarraituz eraki da; 13,7 metroko erruna du, hiru bela eta sei arraun alde bakoitzean. Asteartean, hilak 29, Bilbotik atera eta ostiralean, abuztuak 1, iritsiko da Azkainera. Handik Urdazubiko San Salbatore monasteriora garraiatuko dute burdina. Abuztuaren 2an iritsiko da helmugara.

Ostegunean, uztailak 31, Gipuzkoan izango dugu Brokoa. 13:00etan Zumaiara iritsiko da; Burdinaren kabotajea 2008 proiektua aurkeztu eta bazkaltzeko etenaldia egingo dute. 15:00etan Donostiara abiatuko dira. 17:00etan iritsiko dira portura eta, Kontxako badian ibili ondoren, Burdinaren kabotajea 2008 proiektua aurkeztuko dute berriz. Ondoren, Aquariuma eta Untzi Museoa bisitatuko dute. 20:00etan Donibane Lohizunerako bidea hartuko dute.

Hernani, burdin portua
Hernanin burdinola ugari zeuden: Abillas, Aparrain, Epela, Ereñozu, Errotaran, Fagollaga, Huerratua, Lasa, Olaberriaga... 1790 urtean, Erret Armada ainguraz hornitzeko kontratua eskuratu zuen. Burdinoletan egindako aingurak Hernaniko porturik Donostiara eramaten ziren Urumea ibaitik eta Donostiatik beste batzuetara.

Zumalakarregi Museoaren Zerbitzuen Kartaren emaitzak

2008-07-24T08:06:27Z

Iazko ekainean Zumalakarregi Museoaren Zerbitzuen Karta (PDF, 1,2 MB) argitaratu zen, museoak hartzen dituen konpromisoak eta hauek betetzen diren edo ez neurtzeko bideak islatzen dituen dokumentua. Orain, urtebeteko lanaren emaitzak jasotzeko garaia heldu da eta emaitzak argitaratu dira.

]]> Eskaerei berehala erantzutea, urtero beste erakunde batzuekin elkarlanean aldi baterako erakusketaren bat antolatzea, erakusketa birtualen bat egitea, urtero ikasle eta aisialdi taldeentzat hiru tailer elkarreragile eta animazio jolasak antolatzea... Horiek dira konpromisoetako batzuk, baina Zerbitzu Kartak gehiago ere biltzen ditu. Batzuk bisitariek beraiek emandako balorazioaren arabera neurtzen dira, eta beste batzuk aurretiaz ezarritako helburuen arabera.

Eskaerei emandako erantzunari dagokionez, esaterako, kontsulta eta eskaeren % 80 48 orduko epean erantzuteko konpromisoa hartzen du museoak, eta Zerbitzuen Karta argitaratu zenetik, %91,36ri erantzun zaie epe horren barruan.

Aldi baterako erakusketei dagokienez, Cristina Enea, Donostiako Ingurumen Baliabideen Etxean egindako Esploratzaileak XIX. mendean Le Tour Du Monde erakusketa dugu konpromisoari emandako erantzuna.

Erakusketa birtualei dagokienez, Petit de Meurville-Gipuzkoako flora erakusketa birtuala jarri zuen martxan XIX. MENDEKO albuma kultur webgunean.

Tailer eragileei eta animazio jolasei dagokienez, Zerbitzuen Karta argitaratu zenetik lau egin dira, eta 9,84ko balorazioa jaso dute.

Hala ere, esan bezala, aipatutakoak adibide batzuk bakarrik dira. Konpromiso guztien emaitzak ondoko dokumentuan dituzue:

-Zumalakarregi Museoaren Zerbitzu Kartaren emaitzak (PDF, 45 KB)

Zein gerrate da?

2008-07-22T07:20:09Z

Ba al dakizue nor zen Zumalakarregi Museoaren Ezetz Asmatu! bildumagarri digitalaren seigarren alean azaltzen zen pertsonaia? Bada, On Sebastian infantea zen irudiko protagonista. Asmatu ez bazenuten, orain beste aukera bat duzue; izan ere, jolas honen zazpigarren alea sarean da dagoeneko. Oraingoan, irudia XIX. mendeko zein gerratekoa den asmatu behar duzue.

]]> Erantzun zuzena bidaltzen baduzue museorako bi sarrera jasoko dituzue doan. Animatu zaitezte! Ez da batera zaila, eta gainera, zalantzaren bat baduzue, laguntza txiki bat ere emango dizuegu.

Gogoratu, gainera, jokoan parte hartzen duzuen guztiek urte bukaeran ustekabe atsegina jasoko duzuela etxean.

Parte hartzeko helbidea http://zm.gipuzkoakultura.net/ezetzasmatu/ da. Hilabetero bildumagarria posta elektronikoz jasotzeko aukera ere baduzue; horretarako mzumalakarregi@gipuzkoa.net helbidera idatzi baino ez duzue egin behar.

Donostia XIX. mendean. Untzi Museoak Antonio Brugadaren olio-lan bat eskuratu du

2008-07-17T11:32:51Z

Untzi Museoak XVII. mendeko Kontxako badiaren koadro bat eskuratu zuela kontatu genizuen maiatzean. Orain, bi hilabete geroago, Zurriolako hondartzaren txanda da. Izan ere, Gipuzkoako Foru Aldundiak Donostiako kaian duen Untzi Museoak Antonio Brugadaren 1858ko olio-pintura bat eskuratu du. Zurriola hondartzatik ikusitako ilunabarra agertzen da eta bertan harresiak bota aurreko Donostiaren itxura nolakoa zen ikus daiteke.

]]> XIX. mende erdialdeko Donostiako paisaiak urriak dira olio-pinturetan, eta bakan horietariko bat da Antonio Brugadaren margolan hau. Gran Vía de Bilbao etxean izandako enkantean erosi zen 20.000 eurotan eta 50x80 zentimetro ditu.

Olio-pintura hau azaroaren 2a arte Untzi Museoan ikus daitekeen Donostia, itsas hiria erakusketan dago ikusgai. Erakusketa honetan, erromatarren garaitik gaur egunera doan ibilbidea egin daiteke hiriaren historian barrena; balio historiko zein artistiko handiko hainbat pieza -hauetariko asko jendaurrean erakusten diren lehen aldia da- biltzen ditu erakusketak eta ikus-entzunezko hainbat lan ere badaude hiriaren historian murgiltzeko.

Antonio Brugada
Olio-pinturaren egilea Antonio Brugada da (Madril, 1804-Donostia, 1863), espainiar erromantizismoko lehenetariko itsas-margolaririk garrantzitsuena. Bere ekintza politikoa liberala zela eta, Frantziara joan beharra izan zuen eta 12 urtez bizi izan zen erbestean. Han Goya ezagutu zuen.

Brugada Espainiako itsas paisaia erromantikoak laudatzen aitzindaria izan zen. 1884-1885. urteetan, Donostiako Udaletxerako (Konstituzio plazan) bi mihise handi margotu zituen Antonio Okendoren omenez. Mihise hauek Pernambucon eta Dunetan izandako itsas borrokak irudikatzen dituzte, eta margolanen zati bat harpidetza publikoz ordaindu zen.

Untzi Museoaren kudeaketa eredua

2008-07-07T08:27:46Z

Untzi Museoak ekainaren 30 eta uztailaren 1ean Iniestan (Cuenca) izan diren Jornadas de Gestión de Patrimonio Arqueológico izeneko jardunaldietan parte hartu du. Bertan, El Museo Naval de San Sebastián: un modelo de gestión hitzaldia eskaini du Untzi Museoko zuzendarikide Soco Romano Aguirrek.

]]> PAICE Paisajes de la Celtiberia proiketuak bultzatu, La Manchuelako Arkeologia Museoak antolatu, eta Adiman, Cuencako Manchuelaren Garapenerako elkarteak koordinatu ditu jardunaldi hauek. Bi egunetan, hainbat adituk ondarearen kudeaketa eta zabalkundeari buruzko esperientziak trukatu dituzte, hitzaldi, mahai-inguru eta lan-taldeen bidez.

Itsas ondareari buruz

2008-06-30T09:08:37Z

Ekainaren 18an, asteazkena, Itsas Ondarea turistikoki balioestearen inguruko I. Jardunaldian parte hartu zuen Untzi Museoak, Lekeitioko Kultur Etxean.

]]> Palamos-Gironako Arrantza Museoko Zuzendari Miquel Martík eta, besteak beste, Galiziako Itsas Museoaren Aholkularitza Kontseiluko kide den Dionisio Pereira idazleak parte hartu zuten Lekeitioko Udalak antolatutako ekitaldi honetan. Soco Romano, Untzi Museoko zuzendarikidea, jardunaldiaren moderatzailea izan zen.

Turismo eskaintza kultura baliabideen bidez sustatzeko helburuarekin antolatutako Ondarea, Lekeitioko itsasargia jardunaldien barruan kokatzen da ekitaldi hau.

Bilera Madrilen
Maiatzaren 28an, bestalde, Donostiako Untzi Museoko ordezkariak Madrilgo Ontzi Museoan izan ziren, Itsas Ondarea gordetzen duten Museo eta Zentroen Elkarte bat sortzeko oinarriak prestatzeko bileran.

Untzi Museoaz eta Madrilgo Ontzi Museoaz gain, Bartzelonako Museu Maritim, Cartagenako Itsas Arkeologia Museoa eta Andaluziako Junta egon ziren bilduta.

Ezetz asmatu nor den!

2008-06-25T07:40:29Z

Asmatu al zenuten zenuten Ezetz Asmatu! bildumagarri digitalaren bosgarren alearen erantzuna? Ezagutu zenuten Pasaiako grabatua? Asmatu ez bazenuten, lasai; Zumalakarregi Museoak bildumagarriaren seigarren alea argitaratu berri du eta, beraz, hemen beste aukera bat duzue. Oraingoan, irudian azaltzen den pertsonaia nor den behar duzue.

]]> Erantzun zuzena bidaltzen baduzue museorako bi sarrera jasoko dituzue doan. Gainera, gainera, urte amaierarako ustekabe atsegin bat prestatu dugu parte-hartzaileentzako. Animatu zaitezte! Ez da galdera zaila, eta gainera, zalantzaren bat baduzue, laguntza txiki bat ere emango dizuegu.

Parte hartzeko helbidea http://zm.gipuzkoakultura2.net/ezetzasmatu/ da. Hilabetero bildumagarria posta elektronikoz jasotzeko aukera ere baduzue; horretarako mzumalakarregi@gipuzkoa.net helbidera idatzi baino ez duzue egin behar.

Karl Ferdinand Henningsenek egindako marrazkien koadernoa

2008-06-23T16:24:39Z

Karl Ferdinand Henningsenek egindako 11 marrazki soltez osatutako kuaderno ezezagun eta interesgarria eskuratu du Zumalakarregi Museoak.

]]> Orain arte ez genekien Henningsen marrazkilaria zenik. The most striking events of a twelvemonth´s campaign with Zumalacarregui in Navarre and the Basque Provinces liburuan argitaratutako Tomas Zumalakarregiren grabatuaren egilea zela besterik ez genekien.

Zumalakarregiren lehen biografoa izan zen Henningsen, eta general karlistaren figura nazioarteko bihurtu zuen. 1815ean jaio zen Eskozian eta, 19 urte zituela, bere burua bolondres aurkeztu zuen karlisten aurrean. Zumalakarregiren zalditeriko partaide izan zen eta borroka ugaritan parte hartu zuen. 1835.ean Elliot Hitzarmena sinatzerakoan diplomatiko britainiarra harritu omen zen karlisten artean eskoziar hura aurkitzean.

Zumalakarregi hil zenean, Ingalaterrara itzuli zen, bertan karlisten aldeko lana egitearren. Garai horretan, 1836. urtean, argitaratu zuen lehen aipatutako The most striking events of a twelvemonth´s campaign with Zumalacarregui in Navarre and the Basque Provinces liburua. Arrakasta handia izan zuen, eta urte gutxian alemanierara, frantsesera, italierara eta gaztelerara itzuli zuten. Britainiarren artean eztabaida ugari sortu zuen, Zumalakarregiren figura goraipatu eta karlisten aldeko jarrera nabarmendu baizuen.

1877ean hil zen, gerra guztiak galdu ondoren.

Uda Igartubeitin

2008-06-19T14:25:13Z

Ate joka dugu uda. Kostata bada ere, oraingoan eguzkia bera ere gure artean geratzeko iritsi dela dirudi. Eta jende askok aisiaz gozatzeko denbora gehiago izango du. Beraz, une aproposa izan daiteke Igartubeiti Baserri Museoa bisitatu eta XVI. eta XVII. mendeetako euskal baserrien eguneroko bizitza ezagutzeko. Udako ordutegia ekainaren 15ean hasi zen eta irailaren 15a arte egongo da indarrean:

]]> -Asteartetik igandera, 10:00etatik 14:00etara eta 16:00etatik19:00etara.

-Bista gidatuak 11:00etan, 12:30ean eta 17:00etan (70 minutuko iraupena).

Badakizue, uda honetan ez galdu iraganean murgiltzeko aukera. Hurbil zaitezte Igartubeiti Baserri Museora eta Euskal baserrien eguneroko bizitza ezagutuko duzue. Zaharberritutako eraikina jatorrizko egoeran eta garaiko altzari eta tresneriaz hornituta dago, gure arbasoen bizimodua ulertarazteko asmoz: zer jaten eta edaten zuten, nola janzten ziren, zertan egiten zuten lana... Interpretazio Zentroak euskal baserriaren historia, ezaugarriak, erabilera eta bilakaera erakusten ditu baliabide expografiko berrienak erabiliz.

Urtebeteko ibilbidea mendetako itsas historian zehar

2008-06-05T08:41:51Z

Untzi Museoaren Donostia, itsas hiria erakusketak urtebete egingo du datorren astean. 2007ko ekainaren 12an inauguratu zen eta Gipuzkoako Foru Aldundiak Donostian duen museoaren ildoan aldaketa ekarri zuen.

]]> Museoak 16 urte zituen orduan, eta formula aldatzeko une egokia zela pentsatu zuten museoko arduradunek. Hala, erakusketa iraunkorrerako erabiltzen ziren bi solairu nagusiak iraupen luzeko aldi baterako erakusketentzako espazio bihurtu ziren.

Hain zuzen ere, Donostia, itsas hiria erakusketarekin hasi zen museoaren aro berria. Hau da, Erromatarren garaitik hasi eta gaur arte, hiriaren itsas historiaren berri ematen digun erakusketarekin.

Urte bete pasa da dagoeneko, eta emaitzak oso onak dira. Erakusketari buruzko iritzi eta kritikak primerakoak dira. Gainera, taldeko eta banakako bisitari kopuruak eta bisiten iraupenak gora egin dute. Hori dela eta, hasieran erakusketa maiatzaren 28an bukatzekoa zen arren, epea luzatu egin da eta azaroaren 2a arte izango da ikusgai.

Urtean zehar, ezusteko atseginak ere izan dira. Bonaventura Peetersen Vista de San Sebastián 1652eko marrazkia azaldu izana, esaterako. Marrazkiaren gaia ikusita, ezin aproposagoa zen erakusketa honetarako. Izan ere, XIX.mendea baino lehenagoko Donostiari buruzko oso irudi gutxi daude; beraz, pieza honek balio historiko eta ikonografiko handia du hiriarentzat. Kalitate grafiko bikaineko pieza da eta garai jakin bateko Donostia erakusten du; aurreko hamarkadetan kortso-jarduerak izan zuen indarra gutxiagotua zegoen arren, itsas merkataritza hirian indartsu mantentzen zen (Amerikarekiko -Indiatako Ibiliko Ontzidien bidez- eta Europa Atlantiarrarekiko) garaia, hain zuzen.

Donostiaren itsas historia

Moilen neurri txikiak ikusirik zail egiten da Erdi Aroaz geroztik XIX. mendea arte Donostian garatu zen itsas jarduera garrantzitsua imajinatzea. Izan ere, ikuspegi honetan ahantzi egiten dugu Donostiako portu espazioak bilbe bat osatzen zuela, eta bertan txertatuta zeudela badia, Santa Katalinako portua (Urumearen bokalean) eta Pasaia bera ere. XIX. mendearen hasiera arte, Pasaiako badiako portuko mugimendua Donostiaren kontrolpean egon zen, eta Pasai San Pedro ingurua hiriburuaren udalbarrutian sartuta gainera.

Partekatutako interesez eta gatazkez osatutako eszenatoki honetan itsasoari lotutako ekonomiaren gune bat finkatu zen, eta hainbat unetan garrantzi handia izan zuen Europa mailan. Eta eszenatoki horretan itsasoari lotutako lanbide sorta zabala garatuko zen. Itsas garraio eta merkataritza, alturako eta baxurako arrantza, baleak harrapatzea, ontzigintza, itsasoko gerrak eta kortsarioren jarduera izan ziren, hainbat mendetan zehar, Donostiako biztanle gehienen bizimodua. Banakako zein kolektibo gisako ahalegin horien baturak osatu du, ber argi eta itzal guztiez, hiriaren muin historikoa.

XIX. mendearen amaieran Donostiak alderdi turistikoa sendotu zuen, bide batez, itsasoarekiko eta merkataritzarekiko lotura tradizionala baztertuz. Arrantza, ordea, suspertu egin zen baporea iritsi zenean eta, zailtasunez bada ere, mantendu egin zen XX. mendean zehar. Gaur egun arrantza jarduerak aurrera segitzen du, duintasunez, ziurgabetasuna nagusi den etorkizunari begira.

Erakusketaren edukiak

Ontzi erromatarrak badian
Arkeologi aurkikuntzek ongi erakusten digute erromatarrak Donostian izan zirela.

Itsas garraioa eta merkataritza
Jatorri gaskoia zuten biztanleen ekarpenaz, Donostia Bizkaiko Golkoko merkataritzaren portu nagusietako bat izan zen Erdi Aroan zehar. Burdina eta artilea oinarri zituen merkatuaren dinamikak asko iraun zuen.

Baleazaleak
XVI. mendean asko zabaldu zen Ozeano Atlantikoaz bestaldeko balearen eta bakailaoaren arrantza. Pasaiako portua basetzat izanik, XVI. mendean Donostia mundu osoko baleazale gune nagusia izatera iritsi zen.

Ontzigintza
Euskal ontzigintzak nazioarte mailan zuen ospearen zati handi bat Donostia-Pasaia inguruko ontziolen lanean zegoen oinarrituta.

Hiri kortsarioa
XVII. mendean Donostia espainiar inperioko jarduera kortsarioaren gune nagusienetako bat izan zen.

Itsasoz haraindiko enpresak
XVIII. mendean Amerikarekiko merkataritzan ari ziren enpresen artean Caracasko Errege Konpainia Gipuzkoarra nabarmendu zen, merkataritza jarduera eta kortsarioa bateratu zituen ontzidi sendo eta ahaltsu batez.

Turismo hiria
Hondartzako turismoa XIX. mendearen amaiera eta XX.aren hasiera bitartean finkatuko zen, eta hiriaren itxura eta izaera eraldatuko zituen.

Arrantza portua
Arrantza da tradizio luzea dutenen artetik Donostian mantentzen den itsas jarduera bakarra. Zuzeneko ekarpen ekonomikoaz gain, oso kontuan hartu behar da hiriaren turismorako duen erakarmena ere, kultur eta nortasun erreferentzia izateaz gain, inolaz ere.

Ordutegia
Asteartetik larunbatera:
-10:00etatik 13:30era
-16:00etatik 19:30era

Igande eta jaiegunetan:
-11:00etatik 14:00etara

Astelehenetan itxita

Zein herri da?

2008-05-23T08:10:50Z

Asmatu al zenuten Ezetz Asmatu! bildumagarri digitalaren laugarren alearen erantzuna? Espoz Mina Jeneralak agindutako Lekarozko sutea, horixe zen irudiaren atzean izkutatzen zen gertakizuna. Asmatu ez bazenuten, lasai; Zumalakarregi Museoak bildumagarriaren bosgarren alea argitaratu berri du eta, beraz, hemen beste aukera bat duzue. Oraingoan, irudian azaltzen den herriaren izena asmatu behar duzue.

]]> Erantzun zuzena bidaltzen baduzue museorako bi sarrera jasoko dituzue doan. Gainera, gainera, urte amaierarako ustekabe atsegin bat prestatu dugu parte-hartzaileentzako. Animatu zaitezte!

Hilabetero bildumagarria posta elektronikoz jasotzeko aukera ere baduzue; horretarako mzumalakarregi@gipuzkoa.net helbidera idatzi baino ez duzue egin behar.

Igartubeiti Baserri Museoa itxita ekainaren 4a arte

2008-05-22T08:55:27Z

Gipuzkoako Foru Aldundiaren Igartubeiti Baserri Museoa ekainaren 4ra bitartean publikoarentzat itxita egongo da arrazoi teknikoak medio.

]]> Egun horretatik aurrera berriz ere izango dugu iraganean murgildu eta XVI. eta XVII. mendeetako euskal baserrien eguneroko bizitza ezagutzeko aukera. Zaharberritutako eraikina jatorrizko egoeran eta garaiko altzari eta tresneriaz hornitua dago, gure arbasoen bizimodua ulertarazteko asmoz: zer jaten eta edaten zuten, nola janzten ziren, zertan egiten zuten lana... Horretaz gain, Interpretazio Zentroak euskal baserriaren historia, ezaugarriak, erabilera eta bilakaera erakusten dizkigu.

Kultur Ondarearen Didaktika

2008-05-21T16:13:39Z

Zumalakarregi Museoak, XIX. mendeko Euskal Herriaz jakiteko eta gozatzeko erreferentzia den zentroak, UEU Udako Euskal Unibertsitatearekin batera, Kultur Ondarearen Didaktikari buruzko ikastaroa antolatu du. 2008ko uztailaren 2an eta 3an eskainiko du Eibarren.

]]> Ikastaro honetan, kultur ondarearen ezagutza, ulermena, balorazioa eta errespetua bultzatzen dituzten proposamen teoriko-praktikoak eskainiko dira, ondarea irakatsi eta ikastea posible dela frogatuz. Proposamen horiek hiru testuingurutan landuko dira: ikastetxean, museoan eta Interneten.

Ondarea eta Ondare-hezkuntza kontzeptuak teorian landuko dira, betiere adibide praktikoei ere erreferentzia eginez. Kultur ondarearen irakaskuntzarako zenbait proposamen eta eredu praktiko ere aztertuz. Museum Cemento Rezolan eta Oiasso Museoan eskaintzen diren zerbitzu eta ekintza didaktikoak ere zuzenean ikusteko aukera izango dute ikasleek.

Ikastaro hau kultur Ondarean interesa duen edonori, edozein mailatako irakasleei eta Pedagogia, Magisteritza, Turismo, Artearen Historia eta Filologiako ikasleei zuzendua dago.

Ikastaroaren prezioa: 72€
Ordu kopurua: 10 ordu
Matrikula egiteko: http://ikastaroak.ueu.org/component/ikastaroak/ikastaro/13.html
Hizkuntza: Euskara
Egitaraua:
- Uztailaren 2a
  - Ondare Kontzeptua
  - Ondare Hezkuntza Kontzeptua
  - Jarduera testuinguruak: Non irakatsi-ikasi ondarea?
  - Ondarea irakatsi eta ikasi museoan
  - Bisita gidatua Rezola Museoan eta Irungo Oiasso Museoan
- Uztailaren 3a
  - Ondarea eskolan irakasteko eta ikasteko ereduak
  - Ondarea irakatsi eta ikasi Interneten