Azken asteetan ondoko eskoletako taldeak etorri zaizkigu bisitan: Donostiako eta Tolosako Helduentzako Hezkuntza, Donostiako Karmelo Ikastetxea eta Ordiziako Oinaguren institutua. Irakasleekin batera, adin guztietako ikasleek artxibo historikoaren lana ezagutzeko aukera izan dute: nola lan egiten dugun, nolako dokumentuak zaintzen ditugun (publikoak eta pribatuak), nola gordetzen ditugun (pergaminoa, papera, filma...) eta nola zaharberritzen ditugun hondatuta daudenean (azken bisitan, esaterako, XVI. mendeko dokumentuak).

Oso esperientzia interesgarria iruditu zaienez, zenbaitek bueltatzeko asmoa azaldu dute: erabiltzaile gisa etorriko dira, gure irakurketa gelako dokumentuak kontsultatzera.





Dakizuenez, artxiborako bisita gidatuak, batez ere, Erdi Mailako Hezkuntzako ikasleentzako antolatzen dira, baina bestelako taldeak ere etorri daitezke: Helduentzako Hezkuntzako ikasleak, unibertsitatekoak, artxibo ikasketak egiten dituztenak... Bisitak martxan jarri genituenetik, dagoeneko, 6.500 ikasletik gora etorri zaizkigu bisitan.