6.500 bisitari baino gehiago izan dira Zumalakarregi Museoak eta Donostiako Ingurumen Baliabideen Etxeak elkarrekin antolatutako Esploratzaileak XIX. mendean Le Tour Du Monde erakusketan.

XIX. mende erdi aldera mapek oraindik eremu asko zuri-zuri zituzten. Munduan zehar, beti ere europarren ikuspegitik, ezagutzen ez ziren lurralde asko zeuden. Horiek ezagutzeko espedizioen ugaltzearekin batera, europarren jakin mina asetzeko aldizkariak ere sortu ziren. Aldizkari horietan lehenengoa eta garrantzitsuena Parisen argitaratutako Le Tour du Monde izan zen, hain zuzen ere.

Erakusketa honek urruneko paisaia eta kultura arrotz haietara ez ezik, duela mende eta erdiko europarren ikusmoldera ere hurbildu ditu ikusleak, Cristina Enean uztailaren 12tik irailaren 30era.