Oraindik ere Donostiako Forua, Gipuzkoako lehen Udal Forua, ikusi dezakezue Donostia, Itsas Hiria erakusketan, Gipuzkoako Foru Aldundiak Donostiako kaian duen Untzi Museoan. Gipuzkoako Artxibo Orokorrak utzitako dokumentu hau urriaren 15a arte izango duzue ikusgai. Egun horretatik aurrera, kontserbazio arrazoiak direla eta, faksimile batek ordezkatuko du erakusketan.

1180 inguruan Nafarroako Antso VI.ak (Antso Jakituna) Donostiari emandako Forua ez da gordetzen. Ikusgai dagoen eskuizkribua 1474 urtean egindako helarazpen bat da, eta 1543an korregidorearen aurrean (erregeraren ordezkaria Gipuzkoan) izandako auzi baten zati da, gure Korregimendua fondoan. Notario-kopia honek zehatz jasotzen du latinezko Erdi Aroko testua eta Foruaren bi transmisio biderik zaharrenetako bat da.

Donostia Gipuzkoako lehen hiribildua da. Errege-espazio pribilegiatu gisa sortu zenez, erregeak Forua eman zion, komunitatearen bizitza arautzeko arau eta pribilegio sorta: udal gobernua, justizia administrazioa, zuzenbide merkantila... Geroago Gaztelako monarkiak Gipuzkoako beste itsas herrietara zabaldu zuen estatutu honek, besteak beste, merkataritzari (lur eta itsaso bidezkoa) mesede egiten zion, zerga-salbuespenen bidez. Honek Donostiaren ezaugarri diren jarduera ekonomikoen garapena ahalbidetu zuen.