Langileen autonomiaren artxibo digitala Espai en Blanc fundazioak Arteleku-Gipuzkoako Foru Aldundia eta UNIArekin elkarlanean garatutako ekimena da.

Beste langile mugimenduaren bizipen, liburu eta argitalpenak biltzea du helburu. Beste adjektibo horrekin Espai en Blanc fundazioko kideek Frankismo eta Trantsizio garaian sortu zen mugimendu asanbleario eta antikapitalistari egiten diote erreferentzia. Bildutako dokumentuak interesa duen ororen eskura daude sarean, iraganari "gaur egunetik begiratu ahal izateko", egungo borrokek dituzten beharrak kontuan hartuta alegia. Hortaz, memoriaren inguruko interbentzio politikoa da artxibo honen sorrera, baina baita aktualitatearen ingurukoa ere.