Asteartean, ekainak 3, Stock 13 zikloko bigarren audizio komentatua izango dugu KOLDO MITXELENA Kulturunean. 19:30ean, Areto Nagusian, Jose Mari Zabalaren soinu banda pertsonala ezagutuko dugu.

60. hamarkadatik musikan, zineman, diseinu grafikoan eta argazkigintzan lan egin duen artista irundarra da Jose Mari Zabala. Ez dok Amairu abangoardiako taldeko kide izan zen, Mikel Laboaren alboan gitarrajole elektriko eta esperimentazio lanak eginez, eta Ikimilikiliklik bezalako ikuskizunetan parte hartu zuen.

Geroztik, esperimentaziorako grina bihurtu da bere lanaren adierazle nagusietako bat. 1976an Axut film esperimentala egin zuen, eta 80ko hamarkadan argazkilaritza lanetan ibili zen buru-belarri; hainbat erakusketa antolatu eta Euskal Herriko rock musikaren zenbait disken azalak sortu zituen. Gaur egun oraindik nagusiki argazkilaritzan eta bideogintzan dihardu lanean.