Uztailaren 14tik 25era DINAMIK(TT)AK sormenari buruzko auzolandegia izango da Artelekun. Izena emateko epea zabalik dago eta ekainaren 13an bukatzen da.

DINAMIK(TT)AK sormenari buruzko auzolandegia da. Sormenaren inguruko ikasketak (moda, arte ederrak, arkitektura, diseinua, publizitatea, komunikazioa, zinea…) egin nahi dituzten batxilergoko azken urteko eta erdi mailako zikloko ikasleei zuzendua dago. Irudikapen plastikoa bideratzeko teknikez haratago, sormen-prozesuak errealitatean eta gizartean eragiteko tresna gisa ulertzea eta lantzea da ekimenaren helburua.

Auzolandegian tailerrak, irteerak, eztabaidak, pelikulak, kontzertuak eta taldean burutu beharreko lanak uztartuko dira. Partehartzaileek zenbait sortzaileren lana ezagutzeko aukera izango dute eta beraiekin elkarlanean jardungo dira. Gainera, teknologia berriak (ikusentzunezkoak, mugikorrekin grabatutako filmak, webgune sozialak...) eta izaera plastikoagoa duten beste batzuk (performance, moda, diseinua, serigrafia, marrazkia...) elkartzea ahalbidetuko duten ekintzak egingo dituzte.