Ostegunean, matxoak 5, 19:00etan, KOLDO MITXELENA Kulturuneko Erakusketaretoan bisitaldi gidatu berezi bat egingo dugu Aitor Ortiz artistaren GAP >Espazio sorra erakusketara.

Artistak berak emango dizkigu erakusketari buruzko azalpenak eta parte hartzeko gonbidapena irekia da. Aukera paragabea, beraz, artistak berak lagunduta bere lanak bertatik bertara ezagutzeko.

31 argazkik osatzen dute erakusketa. Aitor Ortizen lanak arkitektura munduarekin izan du beti lotura, benetakoaren irudikapena izan ordez, espazioari eta eraikitze proiektuari buruzko hausnarketarako lan-eremua baita. Erakustaretorako prestatutako proiektuan aurretik garatutako lan bide beretik jarraitu du, beti ere arkitekturari eta espazioaren ikerketari lotuta.

Azken urteotan Rekalde aretoan (2002) eta Artiumen (2006) erakutsitako argazkien inguruan egin duen ikerketaren emaitza dugu oraingo proiektua, guztiz berria. Izan ere, Destructuras, Modular.mod, Modular.rec, Muros de luz, Cajas de luz, lan horiek guztiek argazki-dekonstrukzioa hartzen dute ardatz plano desberdinetatik, argazkiaren aurkezpen espazialaren moldeak zalantzan jarriz.

Baina artistak berak azalduko digu guztia, ostegunean, 19:00ean.

Bertan ikusiko dugu elkar.