gipuzkoakultura - argitalpenak

XIX. mendeko aisiaren katalogoa

2008-11-27T09:48:01Z

Zumalakarregi Museoak, XIX. mendeko Euskal Herriaz jakiteko eta gozatzeko erreferentzia den zentroak, Aisiaren aurkikuntza erakusketa aurkeztu zuen asteazkenean, hilak 26. 2009ko urtarrilaren 23a arte izango dugu ikusgai, KOLDO MITXELENA Kulturuneko Ganbaran. Erakusketaren osagarri gisa, XIX. mendeko aisiari buruzko testu eta hausnarketak biltzen dituen katalogoa argitaratu dute.

]]> XIX. mendeko ikerketan adituak diren ondoko irakasleek parte hartu dute katalogoan:

-Joseba Agirreazkuenaga. Euskal Herriko Unibertsitatea
Aisiazko jarduerak euskal nortasunen berrikuntzen isla, "arin-arin"aren soinupean (1764-1890)

-María Zozaya Montes. Madrilgo Complutense Univertsitatea
Aisialdi askea. Aisialdia Espainian XIX. mendean zehar

-Pierre Géal. Grenobleko Unibertsitatea (ILCEA)
Museoak eta aisialdia XIX. mendean

-Luis Ángel Sánchez Gómez. Madrilgo Complutense Univertsitatea
Ikuskizun gizatiarregiak. Etnia basatien erakustaldiak XIX. mendeko Europan

Hauetaz gain, Harkaitz Cano idazleak gaiaren literatur ikuspegia eskaintzen du Homo Wi-fiaren hastapenak testuan.

Katalogoa irakurri eta, nola ez, urtarrilaren 23a arte KOLDO MITXELENA Kulturuneko Ganbaran izango den erakusketa bisitatzera gonbidatuta zaudete.

Euzkadiko Gudontzidia (1936-39) liburuaren berrargitalpena

2008-11-17T11:01:18Z

Gipuzkoako Foru Aldundiaren Untzi Museoan Juan Pardoren Euzkadiko Gudontzidia. La Marina de Guerra Auxiliar de Euzkadi (1936-39) liburuaren berrargitalpena aurkeztu da. Prentsaurrekoan Foru Aldundiko Kultura Saileko eta Untzi Museoko arduradunak izan dira, Juan Pardo San Gil egilearekin batera.

]]> Hamar urte bete dira Foru Aldundiaren Untzi Museoak Euzkadiko Gudontzidia. La Marina de Guerra Auxiliar de Euzkadi (1936-39) liburua kaleratu zuenetik eta gaiaren inguruko erakusketa antolatu zutenetik. Liburuak hain harrera ona izan zuen, urtebetean agortu zela. Liburuak zein Untzi Museoan antolatu zen erakusketak, bou Nabarra berreskuratzeko azken urtetako saiakerak indartuta, interesa pizten jarraitzen duenez, liburua berriz argitaratzera –1.000 ale gehiago– erabaki dute.

Bigarren edizio honek informazio berria eta argazki gehiago jasotzen ditu. Denera, 300 bat irudi ditu liburuak.

Euzkadiko Gudontzidia. La Marina de Guerra Auxiliar de Euzkadi (1936-39), Juan Pardo San Gil, 2. edizioa, Untzi Museoa, Donostia, 2008, 286 orr. 15 €.

500 orri baino gehiagoko itsas historia

2008-11-03T08:46:15Z

Untzi Museoak Donostia, itsas hiria liburua argitaratu du. Hiriaren itsas historiaren berri ematen digu, sorreratik eta gaur arte. Beraz, ekarpen sendoa egiten dio Donostiako historiaren ezagutza eta zabalkundeari. Bi bertsiotan argitaratu da, euskaraz eta gazteleraz, eta museoko dendan eskuratu daiteke 48 eurotan.

]]> Donostia, itsas hiria liburuan parte hartu duten 25 ikerlariek argitaratu gabeko iturriak landu dituzte eta ekarpen garrantzitsua egin diote hiriko historiaren ezagutzari. Formatu handiko liburu honek 507 orrialde ditu eta bilduma grafiko paregabea eskaintzen du: 633 irudi, horietatik asko argitaratu gabeak, artxibo, museo eta bilduma partikularretan aurkituak. Orain arte ez zen liburu hau bezain osoa eta dokumentatua den Donostiari buruzko bilduma grafikorik.

Azpimarratzekoa da, gainera, liburuaren zabalkunde asmoa. Liburuak historia grafiko gisa ere funtziona dezan saiatu dira arduradunak. Irudien eta argazki oinen segidako irakurketa hutsetik abiatuta proposatzen den kontakizun historikoaren sintesiaz jabetzeko aukera izango du irakurleak.

Donostia, itsas hiria liburuaren egitura eta edukiak

Manuel Lasarteren antologia Auspoarekin

2008-10-16T07:59:49Z

Auspoa bilduman liburu berria dugu: Manuel Lasarte. Iturria ondare. Liburu honekin, Antonio Zavalak hasi zuen argitalpen bildumak 311 ditu dagoeneko. Azken honek, gainera, CD bat ere badakar.

]]> Manuel Lasarteren bertso eta hitzak bildu ditu Iñaki Zubizarretak Auspoaren liburu honetan: "Manuelen bertso eta hitz lauz josia dator liburua, haren antologia moduko bat denez, hain zuzen. Hemen aurkituko duzue Manuel seme zintzoa, senide gazteena, lanean hezia, ferratzaile eta errementari trebea, oinazeak zaildua, espirituz jantzia, bertsolari paregabea, kantari ederra, guraso arduratsua, aitona kariñosoa, kontu-kontalari gozoa".

Manuel Lasarteren oroitzapenak ezagutuko ditugu bertan, haurtzarotik hasita:

"Ni naiz 1927’garren urteko 16’garren egunean jaio nintzana Leitzako Franki baserrian. Gu zortzi senide giñan guztira. Frankin jaio ta azi giñanak; eta ni nintzan zortzietatik gazteena, ala bearrez norbaitek bear zuen-da. Nere aurreko arrebatxo bat an il zan. Joakina, zortzi urte zituelarik. Meningitis edo gaitz gogor batek menderatu zuen gaixoa. Beraz, zazpi senide gelditu giñan bizirik eta aurrera jarraitzeko geure gurasoekin Franki baserri zaarrean: Tomas, Juan, Jose Migel, Katalina, Migel Jose, Eusebio eta ni, Manuel."
(...)
"Gaztetasuna aspaldi pasa zitzaidan eta orain aurtzaroko ixtori politak gogoratzen zaizkit. Leitzako Franki baserrikoak, ain zuzen. Urte zoriontsuak antxe pasa bainituen, gutxi izan baziran ere."

Eta, nola ez, bere bertsoak irakurri...

Gure aurreko aitonak bota
zuten amaika izerdi,
sasitegiak biurtzeraño
soro, baratz ta belardi;
orduan etzan izango orain
aña gazte buru-argi,
baño langille geiago askoz
ori ikusten da garbi.

Guk landa eginda beste batzuek
gizendu eta guritu,
jokera orrek ez ditu gure
biotzak gutxi zauritu;
esango nuke emen alperra
zergatik dan ugaritu:
langille onik ez dutelako
bear bezela saritu

... eta entzun; esan bezala, oraingoan, CD bat ere baitugu Auspoan. Hemen duzue bertan jasotako bertsoetako bat:

-Nere bizitza estuba (MP3; 5,9 MB)

Krisi kabinetea. Katalogoa

2008-09-19T10:34:12Z

Esku artean dugu azaroaren 8a arte KOLDO MITXELENA Kulturuneko Ganbara aretoan ikusgai dagoen Cormán Krisi kabinetea erakusketaren katalogoa.

]]> Jesus Maria Cormanek erakusketarako espresuki egindako 34 koadro, 15 argazki eta 11 collage aurkituko ditugu Ganbaran. Lan horien lagungarri gisa, artistaren poema-bilduma bat (PDF, 507 KB) aurkituko dugu KOLDO MITXELENA Kulturunearen sarreran.

Katalogoan, bestalde, euskaraz, gaztelaniaz eta ingelesez idatzitako bi testu dira artelanen lagun. Juan Manuel Bonetena bata (Jesús María Cormán: pintore-poeta, poeta-pintore), Cormanena berarena bestea (Desagertuak).

Erakusketan edota katalogoan murgildu aurretik, hona hemen lehen testuaren zati bat:

Cormán egun hauetan Donostiako Koldo Mitxelenan ari da bera bakarrik Gabinete de crisis (Krisi kabinetea) erakusketa garrantzitsua egiten. Katalogo honekin dokumentatzen duen erakusketa banako horren karira argitaratu du, beste liburuki batean baina inprimategi beraren eskutik, izenburu bereko poema liburua. Hor, Cormánen ibilbideko beste inoiz ez bezala, pintura eta poesia elkarren eskutik doaz.

Betiere malenkonia handia nagusi egiten den paraje bikainen begiesle eta erakusle, Cormánek orain eskultura, argazkia eta pintura konbinatzen dituen proiektu bati egin behar dio aurre. Eskultura txikiak, kontzentratuak, egiten ditu horiek eskuineko besotik husten hasiz; mikro eskultura horiek gero urre orrizko geruzaz estaltzen ditu —horrek eskulturei gauza zaharkituen itxura ematen die, jatorri exotikodunak edo—; buztinaren hustuketei argazkiak egiten dizkie zuri-beltzean, airean zintzilikatuta; eta azkenik, horrela lortutako irudiak koadroetako aitzakia bihurtzen ditu: batzuk argazkitik hurbil, eta beste batzuk libreagokoak, ameslariagoak, arrotzagoak. Horietan eskulturak monolito monumentalak bihurtzen dira, historiaurreko oihartzunak dituzten totemak, “espazio izugarriaren jagole goratu eta gorenak bali1 1 ra bezala” era kezkagarrian zeruan —bere lurraldeko paisaien gainean, beti berdearen eta grisaren artean— flotatzen ari direnak, nolabait esateko, René Magritte-ren koadro batzuetan objektu batzuk flotatzen duten antzera.

Eta testuaren ondoren, erakusketa ikusi -Ganbaran edo birtualki- eta katalogoa eskuratzeko unea da, inprimatuta edo ondoko PDFan:

Corman Krisi kabinetea erakusketaren katalogoa (PDF, 3,4 MB)

Euzkadiko Gudontzidia (1936-39)

2008-09-15T10:16:15Z

Juan Pardo San Gilen Euzkadiko Gudontzidia (1936-39) liburua berrargitaratu du Untzi Museoak. Itsas armada berezi honen historia aztertzen duen liburu hau 15 eurotan dago salgai, Museoko dendan. Museoaren webguneko argitalpenen atalean ere eskuragarri dago PDFan.

]]> 1998. urtean, Euzkadiko Gudontzidia. La Marina de Guerra Auxiliar de Euzkadi erakusketa antolatu zuen Untzi Museoak. Eusko Jaurlaritzako Defentsa Kontseilaritzak Armada Errepublikarrari bere itsasaldeko trafikoa eta arrantza jarduera babesten laguntzeko, eta euskal portuetarako sarrerak minetatik garbi izateko sortutako itsas armada berezi honen historia ezagutzera ematea zen erakusketaren helburua. Eta erakusketaren osagarri gisa, Juan Pardo San Gilek Euzkadiko Gudontzidia (1936-39) liburua idatzi zuen. Lehen edizio hau agortuta dago, baina zorionez, orain, bigarrena eskuratu dezakegu.

Izan ere, Espainiako Gerra Zibilaren 70. urteurrenaren harira Matxitxako Elkarteak -Euskadiko Gudontzidiko kideek eta senideek sortutako elkartea- antolatutako ekitaldiekin bat eginez, Untzi Museoak liburua berrargitaratu du, gure historia hobeto ezagutu eta itsas-armada honetako kideak omentzeko.

Euzkadiko gudontzidia

1936ko urrian sortu zuen Euzko Jaurlaritzako defentsa kontseilaritzak, armada errepublikarrari itsas trafikoaren eta arrantzaren defentsan laguntza emateko eta euskal portuak minetatik salbu mantentzeko.

Ontziteria hau antolatzeko, gudontzidiko buru Joaquín de Eguíak 50etik gora arrantzontzi gerraontzi bihurtu zituen. Gehienak Pasaiako Arrantza ontzidikoak ziren eta, portua hustu ondoren, Bilboko portuan zeuden geldirik.

Batzuk zaintza lanetarako prestatu zituzten (bou armatuak) eta beste batzuk minak bilatzeko. Guztiak berun kolorez margotu zituzten eta amulan izenaren lehen hizkia edo zegokion zenbakia zeukaten. Brankan ikurriña igotzen zuten eta popan Espainiako errepublikako bandera. Itsasontzi-basea Portugaleten zuten.

Gudontzidiko gune nagusia bou armatuak ziren. Lehenengoak Pasaiako PYSBE enpresako lau bakailao-ontzi izan ziren: Mistral, Vendaval, Euzkal-Erria eta Hispania. Ondoren Euzko Jaurlaritzak ondoko izenak jarri zizkien, hurrenez hurren: Gipuzkoa, Nabaŕa, Bizkaya eta Araba. Geroago bou txikiagoak gehitu zitzaizkion gudontzidiari: Donostia, Goizeko-Izaŕa, Ipaŕeko-Izaŕa, Gazteiz, Iruña...

Zehar 63. Kultura itzulpena

2008-08-21T13:45:09Z

Zehar aldizkariaren 63. aleak kultura itzulpenen inguruan eginiko hausnarketak jaso ditu. Maider Zilbetik Zehar berriaren editorialean ondokoa dio, "Itzulpengintza norberak egunero egiten duen ekintza da. Inguratzen gaituzten kodeak ulertzeko, horietaz baliatzeko eta horiek eraldatzeko ekintza. Ulermen, baliatze eta eraldaketa hau aurrera eramateko teknika ezberdinak erabiltzen ditugu. Hona ekarri ditugunak, teknika ezberdinetatik eta teknika ezberdinez hitz egiten diguten esperientziak dira".

]]> Zeharren 63. alean Maider Zilbetik Cornelia Sollfrankekin izandako solasaldia irakur daiteke. Gainera, Xabier Erkizia, Xabier Paya, Fran Ilich eta Azucena Vieitesek, bakoitzak bere esperientzia oinarri hartuta, kultura itzulpenen inguruan osatutako testuak jaso dira Dossierrean. Xabier Gantzarain eta Frederick Brandãok Lekutik atalean Izibene Oñederra eta Iban Ayestaren lanei buruz idatzitako artikuluak kontsulta daitezke. Azkenik, Iratxe Retolaza eta Xabier Mendiguren Bereziarturen ekarpenak ere jaso ditu Artelekuko aldizkariaren ale berrienak.

Zehar aldizkariaren ale berrienean bildutako testuak eta irudiak online kontsulta ditzakezue.

Beste bi pauso Bertan digitalizatzeko bidean

2008-08-14T10:19:49Z

BERTAN bilduma digitalizatzeko prozesuaren harira, 3. (Arantzazu tradizioa eta abangoardia) eta 11. (Gipuzkoako dorretxeak eta leinuak) zenbakien bertsioak argitaratu berri ditugu. Aurrekoetan bezala, HTML eta PDF formatuetan dituzue eskuragarri, euskaraz, gaztelaniaz, ingelesez eta frantsesez.

]]> BERTAN argitalpen monografikoen bilduma da; Gipuzkoako kultura- eta paisaia-ondarearekin lotutako gaiak lantzen ditu, era erakargarri eta atsegin batean. Orain arte 22 ale argitaratu dira eta oso harrera ona izan dute. Horietako askoren paperezko bertsioa agortuta dago, baina pixkanaka, guztion eskura jartzen ari gara sarean.

Orain, beste bi pauso eman ditugu bide horretan:

Bildumaren hirugarren liburua Arantzazuri eta bere inguruneari buruzkoa da. Edorta Kortadi Olanoren testuak eta Antton Elizegiren argazkiak ditu, eta ondoko ataletan banatuta dago: Lilurazko topografia, Historia apur bat, Erromesak eta ibiltariak, Zaharberritzea eta birsorpena, Berrikuntza eta abangoardia, Ingurua eta arkitektura, Imajinagintza berria, Apostolutza eta pietatea, Abentura eta ekaitza, Infernurako bidea, Gorapena eta aintza, Arantzazuko Andre Maria, Beirategiko zerua, Kripta, Otoigua, eta Arantzazuko eskola.

11. liburua Gipuzkoako dorretxe eta leinuei buruzkoa da: jatorria, bilakaera, ezaugarri arkitektonikoak... Testuak F. Borja de Aguinagalderenak dira eta argazkiak Jose Luis Galianarenak.

Irakurri eta gozatzera gonbidatuta zaudete.

Eguberriak udan, Auspoarekin

2008-07-23T06:25:01Z

Auspoa bildumaren liburu berri bat dugu esku artean. Udan gauden arren, eguberritan mugiltzen gaituen liburu bat, hain zuzen. Antonio Zavalak hasitako bildumaren 310.a dugu Gabon eskeko bertsoak (1814-2000) liburua. Izenak dioen bezala, ia 200 urteko tradizioa biltzen du.

]]> Gabonetan bertso eskean ibiltzeko ohitura aski ezaguna da gure artean. Garai batean horretarako bertsoak sortu egiten ziren. Bada, horietako batzuk biltzen ditu esku artean dugun liburuak. Lehenengoak 1814. urtekoak dira, eta azkenak, 2000koak. Ia 200 urteko altxorra, beraz, irakuleen gozamenerako.

Bertso hauen iturriak anitzak dira: bertsopaper zaharrak, aldizkariak, atxibo-zokoetan aurkitutako esku-izkribuak, aiton-amonen ahotik... Posible izan denetan, doinuak ere bildu dira; irakurleak berak erabakiko du ondoan doinurik ez dutenak nola abestu.

Ikus dezagun, adibidez, 1814ko Eguberrietan Donostiako San Bizente Elizako abesbatzak abesten zituen bertsoak:

1
Esna ari, Pratxubel,
ator, Antoniyo,
erotu dek nere ustez
gure Gregoriyo;
arestiyan pasa dek
ojuka mendiyan
Jesusa jaio dala
Beleneko erriyan.

2
Guazen, para gaitean
lasterka bidean,
Jesus Aur eder ura
arkitu artean;
arra izar argi bat
begiyen aurrean,
Jarriko gaitubena
Belengo lurrean.

Ondokoak, berriz, 1918an argitaratu ziren, eta Orion eta Zarautzen abesten dira:

Olentzaro-abestiyak
1
Salto ta gabriolka,
indarrez beteta,
artzai makil-luze bat
igo dek presaka;
diyo baserrietan
para-para juaz tronpeta:
-Esna zaitezte danok
Jesus jaio’ek eta.

2
Esna ari, Pratxuel,
ator, Antoniyo,
erotu dek nere ustez
gure Gregoriyo;
or zatorrek saltoka
ojuka mendiyan,
Jesus jaio dala-ta
Belengo erriyan.

Bistan da, urteak pasata ere, eta aldaketak aldaketa, bertso hauek, tradizio hauek, badirautela.

Diseinu berria, helbide berria
Bildumako 310. liburua plazaratzearekin batera, orain artekoak biltzen dituen webgunea berritu dugu. www.gipuzkoakultura.net/auspoa helbidean aurkituko duzue.

Webgune berri honek ez dakar itxura aldaketa soilik. Izan ere, webgune irisgarria da. Hau da, webgunea egiterakoan W3Cko (World Wide Weberako Partzuergoa) kide den WAIk ezarritako irisgarritasun arauak bete ditugu, edozeinek erabili ahal izateko muga teknologiko eta pertsonalak alde batera utzita.

Non, nondik, alde, aurka, Gabriel Villota Toyos-en liburua

2008-07-04T07:40:18Z

Gabriel Villota Toyosek Non, nondik, alde, aurka. Arteari buruzko euskal kronikak mendearen hasieran liburua aurkeztu du berriki. Bi bide proposatzen ditu Euskal Herriko eremu artistikora iristeko, egilearen testu hautatuak abiapuntu hartuta.

]]> Alde batetik, egileak 2000. eta 2004. urteen artean Gara egunkariko Mugalari gehigarrian argitaratu zituen zutabeak dauzkagu, gure iragan hurbilaren arte eta kultur lagintzat jo daitezkeenak.

Bestetik, besteak beste, Txomin Badiola, Jon Mikel Euba eta Azucena Vieites artistei buruzko lanak jaso dira, bertakoaren eta globalaren arteko harremanak aztertu eta gaiari buruzko ikuspegia osatze aldera.

Zutabeek nahiz testuek panorama aldakorrera gerturatzen gaituzte; bertan, egileak ez ditu begiz galtzen unean uneko kultur politikak, eta beti agertzen da behar bezain argi, horrela, lanerako material gisa, konplexutasun soziala eta kulturala dituen sorkuntzaren errealitateari pultsua hartzeko.

Liburua Artelekuk argitaratu du eta artikuluen hautaketa lana Arturo/fito Rodríguezek egin du.

Try Again, katalogoa

2008-07-03T08:05:31Z

Irailaren 27a arte, ikusleak jokalari bihurtzen dituen erakusketa dugu ikusgai KOLDO MITXELENA Kulturuneko Erakustaretoan: Try Again. Eta erakusketaren osagarri gisa, katalogoan lanen fitxak bildu ditugu. Baina ez hori bakarrik...

]]> Artista eta lanen fitxez gain, bideojokoen kulturarekin lotutako testuak biltzen ditu Try Again erakusketaren katalogoak; besteak beste, bideojokoen historia, eta generoarekin eta sexualitatearekin lotutako kontuak ditu aztergai katalogoak.

Lanak antolatzerakoan, erakusketaren ideia berari eutsi zaio: ez da inolako hierarkia estetikorik ezarri. Artistak -musika, performance, edo zinemaren arlokoak diren kontuan hartu gabe- eta kritikariak alfabetoaren hurrenkeran agertzen dira.

Hala azaltzen du erakusketaren komisario Juan Antonio Álvarez Reyesek Simulazioa, indarkeria eta arriskua versus ikusle, jokatzaile eta testuingurua testuan:

"Bideojokoak -sortuak, zabalduak eta kontsumituak diren baino testuinguru zabalago batean- ideologia hedatzeko eta mundu-sistema ulertzeko tresna indartsu bihurtzen dituzten zenbait ezaugarri propio eta espezifitate dituzten orainaren azterketa bati ekiteko balio lezaketen zenbait alderdiren azterketa kultural eta ikusizko proiektu bat da hau. Beraz, proiektu hau ikusizko joko interaktiboaren kulturan zentratuta dago eta ez dago, aldi berean. Joko horietatik abiatzen da azterketa-kasu moduan, berehalakoan ulertzeko eratzaileak zaizkion zenbait kontu, aldi berean, orain honen parte kontzeptualak direla. Horrekin batera erakusketa ere bada, baina ez hori bakarrik, haren esparrua erabat gainezkatuta suertatzen baita, ez duelako erabat balio gailu gisa eta egitura gisa, abiapuntu inklusibo gisa preseski erakusketa-eredua erabiltzen bada ere. Hala, katalogo-liburu gailuak isla dezake ia modurik onenean proiektuaren izaera globala, erakusketari dagokionaz harago doana hierarkia estetikoen absentzia islatzea ahalbidetzen duelako, erakutsitakoa “demokratizatu” egiten duelako, eta horretarako jotzen da ordena alfabetikoaren sistemara, zeinean mota desberdinetako testuak, kontzertuak, filmak, bideojokoak, instalazioak, bideoak, performanceak edo dokumentalak azterketa-kasu moduan baitaude hor, eta narrazio bateratu baten parte moduan".

Juan Antonio Álvarez Reyesen testuaz gain, ondokoak ditu katalogoak:

-Lehen Hitzorduak eta Ipuinetako Amodio Istorioak testuan, bideojokoen sexualitatea aztertzen du Mia Consalvok.
-Kontrajokoa testuan, mod artististikoak deritzenei buruz ari da Alexander R. Galloway. Hau da, diseinua, jokoaren arauak edo pertsonaien portaera aldatuz, artistek bideojoko komertzialetan egiten dituzten moldaketei buruz.
-Arauak eta fikzioa testuan Jesper Juulek arau eta fikzioaren arteko harremana aztertzen du. Bere hitzetan, arauek eta fikzioak batak besteari eragiten diote, elkarren artean lehiatzen dute, baina aldi berean, elkarren osagarri ere badira.
-Bideojokoak: gaur egun arteko testuan, azkenik, bideojokoen historia laburtzen dute Gust de Meyer-ek eta Steven Mallie-k. Hainbat epetan zatitu dute bideojokoen historia, bakoitzak bere joera eta ezaugarri bereziak dituelarik.

Katalogoa irakurri eta, nola ez, irailaren 27a arte KOLDO MITXELENA Kulturuneko Erakustaretoan ikusgai dagoen erakusketa bisitatzera gonbidatuta zaudete.

-Try Again erakusketaren katalogoa (PDF, 2,4 MB)

Irakurketa gida guztiak klik bakarrean

2008-06-24T08:18:36Z

KOLDO MITXELENA Kulturuneko Liburutegiak urte hauetan egindako irakurketa gida guztiak biltzen dituen webgune berritua sarean da, irakurketagidak/gipuzkoakultura.net helbidean. Gida guztiak bateratzeaz gain, www.gipuzkoakultura.net webgunean zuzeneko lotura jarri dugu.

]]> Gida hauetan literatura egile ezagunei buruzko aipamen biobliografikoak eta iruzkin kritikoak aurkituko dituzue. Ia guztiak KOLDO MITXELENA Kulturunean izandako ekitaldiekin batera sortu dira. Horietako batzuk aldizka egindako hitzaldi eta erakusketen lagungarri izan dira eta beste batzuk Donostiako Liburutegi Nagusiarekin elkarlanaren ondorio.

Orain arte, www.gipuzkoakultura.net webgunean egile batzuen gidetarako lotura zuzenak zeuden eta aldiro aldatzen ziren. Orain, gida guztiak alfabetikoki biltzen dituen webgunera zuzenean sartzeko aukera duzue.

Gainera, gida batzuk berritu egin ditugu, guztiak irisgarriak izan daitezen. Hau da, W3Cko (World Wide Weberako Partzuergoa) kide den WAIk ezarritako irisgarritasun arauak bete ditugu, edozeinek erabili ahal izateko, muga teknologiko eta pertsonalak alde batera utzita.

Jon Mirande, Lauaxeta, Orixe... berritu ditugun gidetako batzuk bakarrik dira. Baina gogoratu guztiak klik bakarrera dituzuela irakurketagidak/gipuzkoakultura.net helbidean.

Behar gorria Primavera azul. Katalogoa

2008-04-30T14:30:07Z

Prest dugu Manu Muniategiandikoetxea artistaren Behar gorria Primavera azul erakusketaren katalogoa. Maiatzaren 10a arte izango dugu ikusgai erakusketa hau KOLDO MITXELENA Kulturuneko Erakustaretoan, eta esku artean dugun katalogoa osagarri ezin hobea da.

]]> Erakusketan ikus ditzakegun lanen argazkiak artista beraren azalpenekin osatzen ditu katalogoak. Horretaz gain, ondoko testuak ditu, euskaraz, gaztelaniaz eta ingelesez:

- ABCD de las Artes y las Letras aldizkariko kazetari Javier Díaz Guardiolak erakusketa hasi baino lehen egindako elkarrizketa, Egiaren ordua izenburupean. Horrela laburtzen ditu erakusketaren muina eta artistarentzat duen esanahia, elkarrizketaren sarreran:

"Nahiz eta Koldo Mitxelenako hitzordu hau arestiko proiektuen berrirakurketan oinarritu, horietatik hainbat izaera publikokoak, orain barne hartuko dituen espazioaren araberakoa, haren autoreak, Manu Muniategiandikoetxeak (Bergara, 1964), ez du atzera begiratze moduan ikusten: “Justu alderantziz da”, ohartarazten du. “Erakusketa hau beste edozein baino askoz arriskutsuagoa da niretzat, askoz konprometituagoa. Nire energia osoa dago hemen; sortzen zaizkidan arazo guztiak, eta hutsegiteak, ahuleziak, kontraesanak erakustean identifikatuago eta eraikuntzaren prozesu osoan askoz inplikatuago sentitzen naiz”. Horrela definitzen du euskal sortzaile honek Behar gorria. Primavera azul. Erakusketa honetan bere diskurtsoa artikulatzen duen mekanismoaren barrenak erakusten ditu, bai agertu ere bere egungo gogo aldartea eta artista gisa egindako lanean marruskatze puntu bat, muga bat, mugarri bat iritsi izanaren sentipena".

-Harkaitz Canok etorkizunera begira idatzitako testua: Mexikoko urteak.

-Peio Aguirreren testua: Forma, egitate soziala.

Oraindik baduzue erakusketa ikusteko aukera. Maiatzaren 10etik aurrera, katalogo honetan, paperean, gordeko dugu bertan ikusitakoa.

Hainbat urteren katalogoa

2008-04-24T08:10:48Z

Esku artean dugu ekainaren 14ra arte KOLDO MITXELENA Kulturuneko Ganbara aretoan ikusgai dagoen Kemen isuria erakusketaren katalogoa.

]]> Alvaro Matxinbarrenaren erakusketa honek hainbat urte hartzen ditu barne; eta proposatzen zaigun espazioa inbaditu beharreko eta ezkutatu beharreko espazio moduan aurkezten da. Normalean lanez betetzen dena tapatu egingo du kontainer bat gogora dakarren pieza gogor misteriotsu batek. Urte guzti hauetako kontainerra pieza igerikari, ia itsu, denboraz eta odolez betetako pieza bihurtua.

Katalogoak ere hainbat urte hartzen ditu barne. Erretratua atalean hainbat argazki azaltzen zaizkigu (Bidasoa, langela, hainbat lan, amaren familiaren etxeko lorategia...). Ondoren, azken urteetako hainbat proiekturen irudi eta azalpenak biltzen ditu katalogoak.

Juan Pablo Huercanosek Matxinbarrenaren azken urteetako bideari begiratzen dio Alvaro Matxinbarrena, Formaren muga testuan. Hain zuzen ere, 1998tik aurrerako bideari:

Errealaren hitzez hitzezko itxuraren azken lekukotza Alvaro Matxinbarrenaren lanean 1998an egin zituen lanetan aurki daiteke. Une hartatik aurrera, haren sortze lana geometria, lerroa, monokromoa eta espresioaren seriotasunarekiko txera definituago bat erakusten hasi zen. Ibilbide horretan, bidaia horretan, haren lanean behin eta berriz agertzen den borondate bat egiaztatzen da: formak mintzaraztea. Hartara, egileak prozesu luze batean eraikitzen ditu bere lanaren edukiak, hainbat une eta eszenatoki zeharkatuta eta formaren atalasean, formaren mugan espresioa garatuta.

Azken urteetako errepasoa eginez, Ganbaran ikusgai dugun piezara iristen da.

(...) Bertan, oraindik oraintsuko bere lanetara atzera begiratu bati ekiteko aukera barik, artistak berriro planteatzen du lan bakar baten, lan osatu baten nahia, erakusketa honetarako eraikitako piezaren bidez, ziklo oso hori ixten duena. Apenas irekita dagoen gela baten barruko gela hau haren izaera artistikoari lotutako dualtasun horren gainean sustengatzen da. Objektu irekia da, zeharkaezina baina: espazio eraiki baina bizi ezin bat, forma mugikor baina gelditu, latente bat. Berriro muga, ideala. Amildegiaren materia.

Azkenik, Alvaro Matxinbarrenaren lanen zerrenda osoa biltzen du katalogoak: banakako erakusketak, taldekako erakusketak, bekak, bildumak, bibliografia, katalogo eta hitzaldiak, berari buruz prentsan azaldutakoak, komisario lanak eta koordinatzaile lanak.

Kemen isuriaren katalogoa (PDF, 3,4 MB)

2007ko memoria

2008-04-02T10:06:30Z

Esku artean dugu KOLDO MITXELENA Kulturunearen 2007ko memoria. Bertan, urtean zehar izan ditugun jarduerak, erakusketak, argitalpenak eta liburutegiari buruzko estatistika datuak bildu dira lau atal nagusitan: Erakusketak; Jardunaldiak, zikloak eta hitzaldiak; Argitalpenak; eta Liburutegia.

]]> KOLDO MITXELENA Kulturunea Gipuzkoako hedapen artistikoaren erreferente nagusietarikoa da, eta arte garaikideko hainbat erakusketa hartzen ditu urte osoan, bereziki horretarako dituen bi aretoetan: Erakustaretoan eta Ganbaran. 2007an izandakoen nondik norakoak azaltzen dira memorian.

Erakustaretoak egungo artea erakustea du helburu. Urtero bospasei erakusketa izaten ditu ikusgai, horietako batzuk tokiko ekoizpenak eta, beste hainbat, Europako erakundeekin batera antolatutakoak. 2007an ondokoak izan dira:

-Dokumentuak, etorkizuneko memoria
-Sin fin. Islaren isla
-Soinu dimentsioa
-Artista Berrien XLII. Lehiaketa
-Eraiki, Bete Hustu. Espazioaren erabilerak

Ganbarak, bestalde, euskal artista adierazgarrien lana berrikustea eta gaikako erakusketak hartzea du helburu. Honatx 2007koak:

-Suite Èrotique
-Isidoro Guinea eta dekorazio arteak
-Bizitza pintatua
-Batekmila-Euskal munduak
-Biluzik

Jardunaldien atala zabalagoa da. Izan ere, era askotako kultura-ekitaldiak egiten dira egunero Areto Nagusian. Horrez gain, KOLDO MITXELENA Kulturuneak kulturarekin zerikusia duten jardunaldi, ziklo eta hitzaldiak antolatzen ditu hainbat erakunderekin batera. Horietako batzuk ohiko hitzordu bilakatu dira, apirileko Iparraldea Bertan! zikloa esaterako.

2007an argitaratutako lanak ere bildu ditu memoriak. KOLDO MITXELENA Kulturuneak kultur arloko argitalpen ugari egiten du urtero. Alde batetik, erakusketa guztien katalogo artistikoak argitaratzen ditu. Bestalde, ziklo eta jardunaldietan azterturiko egileen biografia, bibliografia eta iruzkinak jasotzen dituzten irakurketa-gidak ematen ditu argitara, bai paperean, bai euskarri digitalean. Auspoa bildumak ere aurrera jarraitu du bere ibilbidean, eta 300 aletik gora du honezkero.

Liburutegiari dagokionez, Zerbitzuen Kartaren bidez hartutako konpromisoen emaitzek eta liburutegiko estatistikek urtearen laburpena eskaintzen digute.

2007ko kontu guztiak laburpen eta argazkiz lagunduta gogoratzeko, honatx memoria:

-2007ko memoria (PDF, 6,1 MB)